Am Samstig hemmer d’Fasnachtssaison in Dällike dörfe ihlüüte. Vorem Chinderumzug, hend mir no zersch ufem Schuelhuusplatz dörfe spille. Da es paar vereinzelti, d’Outdoorakustik nüm gwöhnt sind, hends (het ER) nachem erste Stückli gfröget: „segemal, ghöred ihr mich??!!?!?!“. Ja Dölf, dini Stimm isch unüberhörbar, aber sötsch vorem spille no de Silentbrass usem Trichter neh…

Nach dem au das Problem glöst gsi isch, isches denn mit em Umzug losgange. Eus hends de Vortritt lah, und all Chind sind hine nah ghöselet. S’Publikum isch eus leider meh hine nah gloffe als am Strasserand gstande, jedoch het mer doch vereinzelti Gsichter ade Fänster gsichtet. 

Nachem Umzügli isch de nöchst Termin de Chindermaskeball gsi. Es het vill Chind gha wo sich ab eusere musikalische Meisterleistig erfreut hend. 

Denn sind mer id Garderobe. Ja, Chlüpplis bruched eh Garderobe. Di einte für en taktische Zwüschepfuus, di andere zum Spiili mache. 

De zweiti Uftritt isch am 16.30Uhr planet gsi. Leider hend d’Chind de Maskeball am 16Uhr fluchtartig verlah. Drum hend mer für es paar wenigi nomal alles geh. So langsam isch de Hunger cho und mer hend eus für e Pizza vom Schachtelwirt wieder i eusi Privatgarderobe verzoge. 

Nach dere meh oder WENIGER guete Stärchig ischs Programm mässig sträng wiiter gange. Am 21Uhr isch de nöchsti Uftritt ahgstande. Au da isch s’Publikum nöd vill meh gwachse, trotzdem hemmer probiert, di wenige aber top motivierte Gäst zunere Polonaise z’bewege, was au wunderbar klappet het. 

En gedigene Start id Fasnachtssaison!

Am Sunntig, wie jedes Jahr – KiFa Chloote. 

Usgschlafe und voller Elan, sind mer ad Chinderfasnacht Chloote. Scho vo wiitem het mer s’Problem erchännt – EHC Chloote het hüt Familiematch. Dementsprechend het au d’Parksituation usgseh. Wo denn meh oder weniger alli ihri Chlüpplimobil hend chöne ordnigsgemäss abstelle, isches au scho ziit gsi für de ersti Uftritt. Hüt isch alles wie am Schnüerli gloffe, mer dänket so langsam, hend d’Chlüppli’s sich an nüme SteV Musikus gwöhnt. Jetzt isch de Mei(ste)r offiziell euse neue Musikus.. DANKE STE! 

Nachem musiziere hend mer eus dörfe verpflege lah und s’Sunne nochlli vorm Schluefweg gnüsse. Pause vorbei, denn hend mer scho wieder ad Seck müesse. Au de Uftritt isch eus glunge. De Schlag het  no dörfe für d’Maskepremierig uf d’Bühne und denn isches scho ums ufruume Gange. 

Mer freued eus scho uf’s nöchste Wuchenend – am Samstig Eike und am Sunntig im Altersheim Rotacher. 

Hebed en schöne!