S’zweite Fasnachtswuchenend hend mer a mehrere Ort dörfe verbringe. Gstartet hemmer am Samstig am SchränzAir. Mer hend grad als ersti Gugge vom Tag euse Uftritt gha. Zu eusere Überraschig; de Fasnachtsfreunde Eiken isch nöd entgange das mer bald euses Jubi händ.. Uf de Bühne sind Heliumballön platziert gsi, 50 Jahr Chlüppliseck! Nach eusem Uftritt hemmer sogar no en Jubichueche übercho, so ufmerksam, danke a dere Stell de Fasnachtsfreunde Eiken! Mer hend eus det no chli mit Guggesound beriesle lah und verköstigt, denn hemmer scho müesse disloziere as nöchst Ort, irgendwie Hinterpfufige oder so isch das glaub gsii..
Ah nei, Gipf-Oberfick, genau. Mir sind det ahgfröget worde, zum bimene Fasnachtsgottesdienst, passend zum Thema, di musikalisch Begleitig z’sii. Das isch nöd unbedingt de gwohnt Lebensruum vo de Chlüpplis, trotzdem hend mer eus eifach mal druf ihlah.
Mer sind nöd enttüüscht worde – Mer hend alles geh, de Lüüt hets gfalle und de Chlüpplis au!! Mer hend sogar no usegfunde, dass de armi Pfarrer vo de Chile kein 13te überchunnt. Verpackt inere Schnitzelbank het er DE eini oder ander echli hops gno, gnau euse Humor 😉 Denah hets denn für eus no Suppe und Wienrli zur Stärchig geh, det het sogar no de Chlüppli-Store guete Umsatz chöne mache.
Denn hets scho wieder gheisse disloziere – zurück an den Anfang. wieder in Eike ahcho, hemmer au scho müesse für de nöchst Uftritt sattle. Es paar Fasnachtsfreudigi, di meiste sind zwar au Gugge Mitglieder und ohne Glieder gsi, aber die hend mit eus Vollgas geh. Nach dem sehr glungene Uftritt hend di einte oder andere nochli det verwiilet und de Abig usklinge lah.
Am Sunntig ischs sehr entspannt im PZ Rotacher wiitergange. Det hemmer für d’Bewohnerinne und Bewohner dörfe echli Fasnachtsstimmig id Hütte bringe – also vor d’Hütte. Da mer sehr herzlich mitere Kiste Bier empfange worde sind, hend sich d’Chlüppli grad wohl gfühlt und sind automatisch no motivierter gsi! Wo d’Zueschauer ready gsi sind, hemmer losgleit. Sones dankbars Publikum hemmer no selte erlebt, sogar e Dame im Rollstuehl het ihri Chraft zemmegno und mit Unterstützig zu eusere Musig s’Tanzbei gschwunge. Nöd z’vergässe die Dame ide vorderste Reieh, sie het alles geh!
Nach enere churze Pause hemmer nomal Vollgas geh. Und nomal; s’Publikum hets sichtlich gnosse – und mir au!! Danke dass mer für eu hend dörfe musiziere und de Bewohnerinne und Bewohner es Lache ist Gsicht zaubere. Au ganz herzliche Dank für Speis und Trank, mit dem het mer d’Chlüpplis no immer um de Finger gwicklet! 🙂
Nächst Wuchenend staht Rhyfälde ufem Programm. Mal luege was mer denn da eso für Gschichtli chönd verzelle.
Tschüssikovski
Für d'Chlüpplis:
Ich glaub es list sowieso niemer
de Bricht wüki sehr ufmerksam
und bis am Schluss. Drum:
De erst wo de Fähler findet
und das mit eme Fotibewiis
in Chat schickt, chunnt en
Orde über! :)