Hallo zämme und willkomme zrugg zum Chääsblatt! 

Es isch wiedermal sowiit gsii, mir hend de 11.11 in Züri bestritte. Aber alles vo ahfang ah. 

Tagwach 7.00, ufjedefall bi de meischte. Für alle die glückliche wo in Wasterkinge D.C. bi Brändis hend dörfe nächtige, hets es usgibigs Zmorge geh, mit Späck und Eier. 

Nachem em Bödele isch es denn wieder mal as Schminke gange. Nacheme halbe Jahr ohni Farb im Gsicht, hend die einte oder andere d’Schminkahleitig müesse füregrüble. Ich glaub es het aber öber geh, wo d’Ahleitig vo hine geg füre glese het. 

Denn hend sich d’Chlüppli au scho uf de Wäg uf Züri gmacht und obligat all nöd Fasnächtler im Zug echli uf Trap ghalte. Am Züri HB ahcho scho de ersti Schockmoment. ES HET KEI GURKEWASSER!!! Aber so spontan wie mer sind, hend mer das Problem churzerhand ide Bahnhofshalle glöst. 

Wo sich denn all Chlüpplis ide Bahnhofshalle wiedergfunde hend, simmer loszottlet richtig Hirscheplatz. nach dem beschwerliche Spaziergang dur all die Baustelle im Niederdörfli, hemmer gspannt uf de Countdown gwartet. Wos denn endli 11.11 gschlage het, hemmer voller Herz und Seel mit vielne andere Gugge de Uftakt mit em Guggemarsch ihgschlage und blaset. Im Ahschluss hemmer no dörfe es Platzkonzert im Wechsel mit anderne Gugge geh. Nach dem durenand hemmer eus denn gmüetlich zu de Bierhalle Wolf begeh.  

Det ahcho hemmer denn au grad losgleit, und für es handverlesenigs Publikum chöne chli Stimmig mache. Grosszügigerwiis hemmer i eusere Pause no e paar Bierli und en super mega gigantisch ober hammer affe Ti**e geile Zimtlikör spendiert becho (naja ). 

Denah hemmer d’Bsuecher vo de Bierhalle nomal dörfe musikalisch beglücke, bevor mer in Züghuuschäller disloziert hend. Bi allne het de Mage scho täubelet, bi de meiste will sie Hunger gha hend. Obligat hets denn natürli au eis, zwei oder e paar meh Bier Flambée mit Füürwasser geh. 

Nach Spiis und Trank sind denn d’Chlüppli au no uf d’Bänk und hend au det no dörfe spille. 

Ganz ungwohnt het eus de neu meiSTEr nöd dur d’Bahnhofstrass gjagd, sondern zrugg is Niederdörfli. Wo mer wieder zrugg ufem Hirscheplatz gsi sind, hend mer d’Performance vo eusem Chlüpplli-Lebe abgelieferet (NIIICHT). Zwar hemmer es biz öbis versemmelet aber mer sind d’Sieger vo de Herze. 

Voller Vorfreud ufs Konzert ide Bahnhofshalle, hend mir eus uf de Weg gmacht. Es het zwar en Moment duuret, bis sich denn all wieder zemmegfunde hend, aber de Wille zellt. Nachdem mer eus wunderschön formatiert hend und ready gsii sind, zum i dere hammer Atmosphäre nomal alles geh, simmer scho nach em erste Stückli usegrüehrt worde. Will Guggemusig ebe so luut isch, ruhestörig, blablabla……. Jajaja sie hend ja nume ihre Job gmacht, aber es isch trotzdem seeehr frustrierend gsi. 

Aber wie mer ja weiss, d’Chlüpplis sind nöd uf de Chopf gheit… Nach ewige Diskussione hend mir eus denn DIREKT vor d’Bahnhofshalle begeh und eus natürlich au dere voll und ganz zuegwändet. Au vo det us, het mer eus vo Gleis 3 bis 18 und eventuell au no wiiter wunderbar ghört!! Di Zuehörende hend freud gha und d’Chlüppli au, trotz allem isch eus doch en sehr guete Abschluss glunge. 

Danke ah alli wo Teil vo dem Tag gsii sind! Bis denn es wenn! 

Olga, Brändi, O’Fuck,