S’letschte Fasnachtswuchenend vo dere Saison hemmer obligat mit em Ufbau vom Chlüppligüner-Dörfli gstartet. Fritschi, der Frühaufsteher, war der Erste. Nach ihm hend sich denn au langsam aber sicher de Rest vom Sauhuufe ihgreielet. Sofort d’Stüehli uspackt und zersch emale d’Sunne bimene Spassgetränk gnosse. Wo denn immer meh Farb im Gsicht gha hend, isch de wichtigsti Programmpunkt ahgstande: Esse. D’Fressgugge Chlüppliseck isch au das Jahr wieder oberhammermässig verköstigt worde. Salat, Würst und Spiessli. Danke a dere Stell de Olga und em Brändi ihrem Cheffe für’s Sponsoring!
Nach Speis und Trank und gmüetlichem zämme sii, hend mir eus au müesse langsam uf de Weg an Maskeball mache. Döt ahcho, hemmers eus grad wieder gmüetlich gmacht, Eis gno und di erschte zwei Gugge vom Abig gloset. Am 10i sind mir denn a de Reieh gsi. Wie immer hemmer euses Beste geh und händ d’Mängi chöne mitriise. Mängi? Es sind leider nöd eso vill Bsuecher ahwesend gsi, wies eigentlich z’Rorbas üblich isch, aber es isch es dankbars Publikum gsi. Nachem Uftritt het de Mei(ste)r no e schöni Ahsprach ghalte, für di eine (also eus) positiv, für di andere (also nöd eus) eher negativ… anyways, DANKE Ste! Da mer ja ab dem Ziitpunkt nüme hend müesse Spiilfähig si, isch de Abig usgiebig gnosse worde. Bis denn the last ones standing am 02.15 Uhr vor d’Tür gstellt worde sind, weil ende Gelende.
Im Chlüppligüner-Dörfli ahcho, het denn de Dölf sich no luuthals erkundigt, obs Gammelfleisch echt au no wach isch..? Er het denn aber kei Antwort me us dem Bumsconainer übercho. Da de Dölf und d’Olga nöd eso liislig zrugg is Brändimobil cho sind, hend de Brändi und d’O’Fuck au no gmerkt, dass de Cervelat zum Chüehlschrank usegno worde isch. Und Zack sind all wach gsi und hend sich z’vierte en Morgeamdrüüsnack gönnt.
Am Sunntig Morge isch bi de einte scho am 08.30Uhr Tagwach si. Im Brändimobil, het mer zersch no müesse d’Sitzglegeheit frei mache, bevors z’Morge geh het. Da mer sich d’Schlafglegeheit im Brändimobil hert muess verdiene, isch denn vo de Schlafgäst no churzerhand de Service übernoh worde..
Nachdem sich di meiste denn de Buuch vollgschlage hend, isches zum gmüetliche Zämmesii übere gange. Nach dem die vom Zunftmeister wieder mit de Umzugsnummere zrugg gsi sind, hend mer langsam müesse zum Umzugsstart disloziere. Dank em überus schöne Wetter, hend di meiste bim Ihstah scho gschwitzt, zum Glück het de Start nöd so lang uf sich warte lah.
Während em Umzug hend mer eus no fliisig dörfe abliechte lah. De Filipe, het sich die Müeh gmacht und ganz vill tolli Schnappschüss vo eus gmacht. Danke vill Mal fürs cho und s’zur Verfüegig stelle vo dine tolle Föteli!
Nachem guet bsuechte Umzug, hets denn au scho wieder Fuetter geh für d’Fressgugge Chlüppliseck. De nöchsti Uftritt isch uf di 16.00 Uhr gsi, dementsprächend hend sich d’Chlüppli i de zwüscheziit nochli under d’Lüüt gmischt. De allerletschti Uftritt vo dere Saison. Mit vill Freud aber au Wehmuet hend mir no eimal alles geh und s’Fasnachtsfeeling gnosse. Nach em letschte gspillte Ton isch für eus endgültig Schluss gsi. Mer hend eus denn aber no für es Chlüppli-Meeting versammlet. Voller Freud hemmer dörfe erfahre, dass de Mei(ste)r sis Amt als Musikus no wiiter für eus usüebe möcht. Nomal: DANKE Ste!!
Denn ischs as Ufruume gange, mer hend natürli euses Chlüppligüner-Dörfli ordnigsgemäss und suuber verlah. Danke vill Mal ad Fima Kyburz wo eus au das Jahr wieder de Strom zur Verfüegig gstellt het und ade Gmeind Freiestei für de Platz!
So, Ende, Schluss, aus.
Liebi Chlüppli’s, danke für die wundervolle Moment wo mer die Saison wieder hend zemme dörfe verbringe, für jede dumm Spruch, blödi Witz, fürs Schiisdreck mache, ernsti Diskussione, viel Lache, schöni Gspröch, geile Sound und vor allem für euse Zämmehalt.
Mir vo de Redaktion Chlüpplispalter hend jedesmal Müeh, aber au Freud und viel z’Lache, wemmer wieder öpis dörfed fürs Chääsblatt zemmebrösmele. (Au wenns mängisch Disskusione git über öbis ober öpis, ä oder e, ect. pp.) Mer wend nomal erwähne, dass d’Schriibfähler jede dörf phalte, scho immer so gsi und wird au immer so blibe.
Hebed en schöne aber immer nonig euse
Olga, Brändi, O’Fuck.